நெருக்கடியான காலகட்டங்கள் நண்பர்களை மேலும் நெருக்கமாக்குவதாக அமெரிக்க ஜனாதிபதி டொனால்ட் ட்ரம்புக்கு பதிலளித்துள்ள பிரதமர் மோடி, ஒன்றாக இணைந்து கொரோனாவை வெல்வோம் எனக் குறிப்பிட்டுள்ளார்.

கொரோனா வைரஸ் தொற்று நோயாளிகளுக்கான ஹைட்ரொக்சிகுளோரோகுயின் மருந்தை அமெரிக்காவிற்கு வழங்கும் முடிவிற்காக இந்தியாவிற்கும் இந்திய மக்களுக்கும் நன்றி தெரிவிப்பதாகவும், அசாதாரணமான சூழ்நிலைகளில், நண்பர்களுக்கு இடையேயான நெருக்கமான ஒத்துழைப்பு அவசியம் என்றும் ட்ரம்ப் ருவிற்றரில் நேற்று பதிவிட்டிருந்தார்.

இந்த உதவியை அமெரிக்கா ஒருபோதும் மறக்காது என்றும், கொரோனாவுக்கு எதிரான போரில் இந்தியாவுக்கு மட்டுமல்லாது மனிதகுலத்திற்கே உதவும் பிரதமர் மோடியின் வலிமையான தலைமைக்கு நன்றி என்றும் ட்ரம்ப் கூறியிருந்தார்.

இதனிடையே, தாங்கள் கேட்டதைக் கொடுத்து அசத்திய பிரதமர் மோடிக்கு நன்றி என்றும், இதை எப்போதும் நினைவில் வைத்திருப்போம் என்றும் செய்தியாளர் சந்திப்பு ஒன்றிலம் ட்ரம்ப் நன்றி தெரிவித்திருந்தார்.

இந்நிலையில், ருவிற்றரில் பதிலளித்துள்ள பிரதமர் மோடி, இதுபோன்ற காலகட்டங்கள் நண்பர்களை மேலும் நெருக்கமாக்குகின்றன எனத் தெரிவித்துள்ளார்.

இந்திய-அமெரிக்க நட்புறவு முன்னெப்போதையும் விட வலிமையாக உள்ளது என்றும், கொரோனாவுக்கு எதிரான மனிதகுலம் நடத்தும் போரில் சாத்தியமான அனைத்து உதவிகளையும் இந்தியா செய்யும் என்றும், நாம் ஒன்றாக இணைந்து இதில் வெற்றிபெறுவோம் எனவும் பிரதமர் மோடி கூறியுள்ளார்.

Extraordinary times require even closer cooperation between friends. Thank you India and the Indian people for the decision on HCQ. Will not be forgotten! Thank you Prime Minister @NarendraModi for your strong leadership in helping not just India, but humanity, in this fight!

— Donald J. Trump (@realDonaldTrump) April 8, 2020